У Беларусі з кожным годам умовы для работы з моладдзю і для моладзі становяцца ўсё лепшыя. Акцэнт на гэтым зрабіла сёння начальнік Рэспубліканскага маладзёжнага цэнтра Юлія Зінкевіч на семінары "Паспяховыя практыкі па рабоце з моладдзю", які праходзіць у Гомелі, перадае карэспандэнт БЕЛТА.
"У нашай краіне ўдзяляецца асаблівая ўвага дзяржаўнай маладзёжнай палітыцы, у тым ліку і працуючай моладзі. Яна пастаянна ўдасканальваецца", - падкрэсліла Юлія Зінкевіч. Так, унесены змяненні ў закон аб дзяржаўнай маладзёжнай палітыцы, дзе з'явіўся пункт аб маладзёжных ініцыятывах, аб тым, што маладыя людзі могуць атрымаць гранты на рэалізацыю сваіх праектаў у гэтай сферы.
"У нас вялікая колькасць цікавых ініцыятыў, праектаў для моладзі, - адзначыла начальнік Рэспубліканскага маладзёжнага цэнтра. - З кожным годам усё лепшымі становяцца ўмовы для работы з моладдзю і для моладзі".
У паўднёва-ўсходнім рэгіёне лепшыя практыкі, праекты акумулюе ў тым ліку і абласны Савет працуючай моладзі. "Асноўная задача савета - кансалідаваць той вопыт, які ёсць на розных прадпрыемствах, і пашырыць геаграфію ўзаемадзеяння працуючай моладзі. Каб, напрыклад, моладзь са сферы медыцыны ведала, чым жыве моладзь, якая працуе ў металургіі, на Беларускай чыгунцы, у сельскай гаспадарцы і г.д", - расказаў старшыня абласнога савета Андрэй Ананчыкаў.
У якасці прыкладу паспяховых практык работы з моладдзю ён назваў валанцёрскія атрады на "Гомсельмашы", рэалізацыю маладзёжнай палітыкі на БМЗ, праекты Беларускай чыгункі, якія датычацца сямейнага адпачынку.
Сферы, дзе маладыя людзі могуць рэалізаваць свае ініцыятывы, самыя розныя - ад дабрачыннасці да развіцця спорту і турызму, удакладніў старшыня. "Моладзь імкнецца да таго, каб як мага больш узаемадзейнічаць. І мы будзем у гэтым дапамагаць", - запэўніў ён.
У тым, што данесці да моладзі найбольш ясна, даходліва, эфектыўна ідэі, трансліраваць пэўныя каштоўнасці, можна менавіта на мове моладзі, упэўнена намеснік начальніка галоўнага ўпраўлення ідэалагічнай работы, культуры і па справах моладзі Гомельскага аблвыканкама Таццяна Кручко. "Сучасная моладзь неабыякавая, вельмі актыўная. І ў адкрытасці ўсяму новаму, у мабільнасці дасць фору старэйшаму пакаленню", - лічыць яна.
Удзельнікі сённяшняга форуму азнаёміліся з праектам "Марафон паспяховых практык у сферы арганізацыі работы з моладдзю", абмеркавалі розныя формы і метады такой работы. Ішла на сустрэчы размова і аб тэхналогіях процідзеяння маніпуляванню свядомасцю моладзі ў інфармацыйнай прасторы.
Як падкрэсліла прафесар кафедры кіравання і тэхналогій адукацыі Гомельскага абласнога інстытута развіцця адукацыі Надзея Котава, самае важнае - ведаць рэальную сітуацыю, у якой мы жывём. Каб, грунтуючыся на тых пагрозах, якія маюць месца быць у тым ліку ў інфармацыйным асяроддзі, умець адрозніць, ці з'яўляецца інфармацыя праўдзівай, альбо яе выкарыстоўваюць для маніпуляцыі свядомасцю. "Чалавек павінен умець дыскутаваць, спрачацца, адстойваць свой пункт гледжання. І каб аказацца пераможцам у дыскусіі, трэба мець вялікі факталагічны матэрыял, апеляваць шматлікімі фактамі", - дадала яна.
У праграме форуму таксама работа інтэрактыўнай панэлі аб удасканаленні работы з моладдзю на прадпрыемствах і ў арганізацыях, дыскусіі аб узаемадзеянні з БРПА і БРСМ.
Арганізатарамі семінара выступілі Міністэрства адукацыі, галоўнае ўпраўленне ідэалагічнай работы, культуры і па справах моладзі аблвыканкама, БРСМ і БРПА, абласная арганізацыйная структура РДГА "Беларускае таварыства "Веды".
Да спіса