Выстава твораў графікі і жывапісу Галіны Нячаевай "Час цыклонаў" пачала работу ў Гомелі ў палацы Румянцавых і Паскевічаў, паведамілі карэспандэнту БЕЛТА ў Гомельскім палацава-паркавым ансамблі.
Экспазіцыя прымеркавана да юбілею аўтара. "З'яляючыся шматграннай творчай асобай, Галіна Нячаева вядома і як таленавітая паэтэса - аўтар своеасаблівых філасофскіх вершаў-разважанняў, і як мастак, які тонка адчувае хараство навакольнага свету, выдатна валодае тэхнікай малюнка і жывапісу. У гэтым змогуць пераканацца наведвальнікі выставы", - адзначылі арганізатары.
Свет у творах мастака загадкавы і поўны сімвалізму. Яго напаўняюць фантастычныя вобразы коней, якія кружацца ў віхорах са святла і колеру, сірэн, што рухаюцца ў патоках паветра і вады, іншых міфалагічных стварэнняў. Сярод работ - шмат замалёвак, зробленых у рэалістычнай манеры падчас падарожжаў па роднай Гомельшчыне, поўначы Расіі, Крыме.
"Мяккасць пастэлі, гуашы і строгасць графічных ліній дапаўняюць адзін аднаго ў творчасці Галіны Нячаевай і даць нам магчымасць лепш зразумець светаадчуванне майстра", - дадалі ў палацы.
Галіна Нячаева нарадзілася ў Ветцы і прысвяціла сваё жыццё даследаванням самабытнай стараверскай культуры і мастацтва, цэнтрам якой на беларускай зямлі з'яўляецца яе родны горад. Яна стаяла ля вытокаў цяпер шырока вядомага ў Беларусі і за яе межамі Веткаўскага музея стараверства і беларускіх традыцый імя Ф.Р. Шклярава, на працягу многіх гадоў узначальваючы яго. За плячамі аўтара незлічоная колькасць навуковых публікацый, кніг і выдатных выставачных праектаў.
Выставу "Час цыклонаў" у палацы Румянцавых і Паскевічаў можна наведаць да 28 лістапада.-0-